വിവാഹത്തിന് ഒരുങ്ങുന്നവരോട്...

ആദ്യമായി വിവാഹം കഴിക്കാൻ പോകുന്നവർ ശ്രദ്ധിക്കേണ്ട ഒരുപാട് കാര്യങ്ങൾ ഇങ്ങനെ സംഗ്രഹിക്കട്ടെ...

1) പ്രണയം, ലൈംഗീകത, മക്കൾ ഉണ്ടാകൽ,കുടുംബ രൂപീകരണം, പരസ്പരം താങ്ങും തണലുമാകൽ..  എന്നിങ്ങനെ ബഹുമുഖ ലക്ഷ്യങ്ങൾ ഉള്ള ഒരു സൽ കർമ്മമാണ് ഇസ്‌ലാമിൽ വിവാഹം. അതൊരു പ്രണയകഥ മാത്രമല്ല. 

2) ശാരീരികവും  മാനസികവുമായ ആരോഗ്യം ഉള്ളവരാണ് വിവാഹ കരാറിൽ ഏർപ്പെടേണ്ടത്.   മാനസികാരോഗ്യം വളരെ പ്രധാനമാണ്. അന്വേഷണ സമയത്ത് ഒളിച്ചു വെക്കുന്ന കാര്യങ്ങൾ പലതും പിന്നീട് ത്വലാഖിൽ എത്തിക്കുന്നു.

3) മാതാ പിതാക്കൾ, കുടുംബങ്ങൾ, ഉസ്താദ്മാർ എന്നിവരുടെ പ്രാർഥനയും അംഗീകാരവും സഹകരണവും ആവശ്യമുള്ള കർമ്മമാണ് വിവാഹവും ദാമ്പത്യവും. ഒളിച്ചോടി വിവാഹം ചെയ്തവരൊക്കെ പിന്നീട് പല ദുരനുഭവങ്ങളും ഏറ്റു വാങ്ങിയിട്ടുണ്ട്.

4) വിവാഹത്തിന് മുമ്പ് അല്ലറ ചില്ലറ ചുറ്റിക്കളി അറിവില്ലായ്മ കൊണ്ടു സംഭവിച്ചിരിക്കാം. അതിനു തൗബ ചെയ്യുക. എല്ലാ ചുറ്റിക്കളികളും അവസാനിപ്പിച്ചു വേണം വിവാഹ ജീവിതത്തിലേക്ക് പ്രവേശിക്കാൻ. പിന്നീടുള്ള ചുറ്റിക്കളികളും വേലി ചാട്ടങ്ങളും പരിഹാരമില്ലാത്ത പ്രത്യാഘാതങ്ങൾ  ഉണ്ടാക്കും.

5) ഒന്നോ രണ്ടോ മാസത്തെ പ്രീമാരിറ്റൽ കോഴ്‌സുകളിൽ എല്ലാവരെ ക്കൊണ്ടും പങ്കെടുക്കാൻ  കഴിയണമെന്നില്ല. അതിനാൽ വിവാഹത്തെയും ദാമ്പത്യത്തെയും കുറിച്ചുള്ള നല്ല പുസ്തകങ്ങൾ വായിച്ചും വിദഗ്ധരുടെ ഉപദേശങ്ങൾ കേട്ടു മനസിലാക്കിയും   വിവാഹ ജീവിതത്തിലേക്ക് പ്രവേശിക്കുക.

6) മുതിർന്നവരുടെ ഉപദേശങ്ങളും അഭിപ്രായങ്ങളും പരിഗണിച്ചു കൊണ്ടു ബോധ പൂർവം ഇണയെ തെരഞ്ഞെടുക്കണം. കഴിയുന്നത്ര പൊരുത്തങ്ങൾ നോക്കിയാൽ വിവാഹ ശേഷം അത്രയും പൊരുത്തപ്പെടാം.

7) വിവാഹം കഴിക്കാൻ പോകുന്നവർ പരസ്പരം കാണുമ്പോൾ തന്നെ ശരിക്കു കണ്ടു സംസാരിച്ചു കൊള്ളണം.വിവാഹ   നിശ്‌ചയവും നിക്കാഹും കഴിഞ്ഞ ശേഷം എനിക്ക് വേണ്ടെന്നു പറഞ്ഞു എല്ലാവരെയും വെറുപ്പിക്കരുത്.

8) വിവാഹ ശേഷം പഠനം തുടരാനും ജോലിക്ക് പോകാനും വിദേശത്തു പോകാനും ഉദ്ദേശ്യം ഉണ്ടെങ്കിൽ വിവാഹം നിശ്ചയിക്കുമ്പോൾ തന്നെ അതൊക്കെ പറഞ്ഞിരിക്കണം. പിന്നീട് അതിന്റെ പേരിലൊന്നും ത്വലാഖിൽ എത്തരുത്.

9) വിവാഹ ശേഷം ഭാര്യ പള്ളിയിൽ പോകണോ, നേർച്ച ചോറു തിന്നണോ, തിന്നാതിരിക്കണോ, സിയാറത്ത് ടൂറിന് കൂടെ പോരണോ എന്നൊക്കെ വിവാഹ നിശ്‌ചയ സമയത്തു തന്നെ തുറന്നു പറയുന്നത് പിന്നീട് പ്രശ്നങ്ങൾ ഇല്ലാതാക്കും. ആദർശ നിഷ്ഠകളൊക്കെ ആദ്യമെ പരസ്പരം അറിയിക്കുക. അതിന്റെ പേരിലൊക്കെ പിന്നീട് വഴക്കുകൾ ഉണ്ടാകുന്നത്  ബോറാണ്.

10) ദമ്പതിമാർക്ക് പരസ്പരം ബാധ്യതകൾ ഉണ്ട്. അതു പോലെ പരസ്പരം അവകാശങ്ങളും ഉണ്ട്. ആരും ആരുടെയും അടിമകൾ അല്ല. ദാമ്പത്യത്തിൽ പ്രശ്നങ്ങൾ സ്വാഭാവികമാണ്. പരസ്പരം ക്ഷമിച്ചും സഹകരിച്ചും മുന്നോട്ട് പോകാതെ ഇന്നെവരെ ഒരു ദാമ്പത്യ ബന്ധവും വിജയിച്ചിട്ടില്ല.

11) ലൈംഗീക ബന്ധവും ഭർതൃ വീട്ടിലെ രീതികളും ശരിക്കും പരിചയിക്കുന്നത് വരെ എളുപ്പമാവില്ല. ലൈംഗീക പ്രശ്നങ്ങൾക്ക് ഡോക്ടേഴ്‌സിനെ   കാണുക. ഭർതൃ വീട്ടിൽ പാലിക്കേണ്ട മര്യാദകൾ പെണ്കുട്ടി സ്വമാതാവിൽ   നിന്നും സഹോദരിമാരിൽ നിന്നും മനസിലാക്കണം. വധുവിനോട് പെരുമാറേണ്ട വിധം വരൻ അവന്റെ കൂട്ടുകാരിൽ നിന്നല്ല, അത് പറഞ്ഞു തരാൻ കഴിയുന്ന മുതിർന്നവരിൽ നിന്നു മനസിലാക്കണം. 

12) ഭർതൃ വീട്ടിലെ അല്ലറ ചില്ലറ കുറ്റങ്ങളും കുറവുകളും സ്വന്തക്കാരോട് പറഞ്ഞു അവർക്ക് ഭർതൃ വീട്ടുകാരോട് വിരോധവും ദേഷ്യവും ഉണ്ടാകാതെ ഇരിക്കാൻ പെണ്കുട്ടി ശ്രദ്ധിക്കണം.

13) ഭാര്യാ ഭർതൃ ബന്ധത്തിൽ മറ്റുള്ളവർ കേറി ഇടപെട്ടു  പ്രശ്നങ്ങൾ ഉണ്ടാക്കുന്നതിനെ കുറിച്ചു ദമ്പതികൾ ജാഗ്രത പാലിക്കുക. മറ്റുള്ളവരെ തൃപ്തിപ്പെടുത്താൻ ത്വലാഖ് നടത്തി പിന്നീട് വീണ്ടു വിചാരം ഉണ്ടാകു മ്പോഴേക്കും പലതും നഷ്ടപ്പെട്ടിരിക്കും.

14) അനാവശ്യ  പുരുഷാധിപത്യം ബോറായി മാറിയ ഇക്കാലത്തു കാര്യങ്ങളൊക്കെ ഭാര്യയും ഭർത്താവും ഒത്തൊരുമയോടെ  കൂടിയാലോചിച്ചു തീരുമാനിക്കുന്നത്  നല്ലൊരു  ദാമ്പത്യ ജീവിതത്തിനു നല്ലതാണ്. 

15) എല്ലാ വിജയങ്ങൾക്കും അല്ലാഹുവിന്റെ  തൗഫീഖ് അത്യാവശ്യമാണ്. അവനാണ് ഇണകളിലും മക്കളിലും കണ്കുളിർമ്മ നൽകുന്നത്. അവന്റെ സഹായമില്ലാതെ വിജയിക്കാമെന്നത് വെറും തോന്നലാണ്.

അൻസാർ  അലി  നിലമ്പൂർ