സയൻസിന്റെ പരിമിതികൾ

സയൻസിന്റെ പ്രാധാന്യം ഇന്ന്   ആർക്കും കുറച്ചു കാണുക സാധ്യമല്ല. അതിനെ അവമതിക്കാനും കഴിയില്ല. മനുഷ്യ പുരോഗതിയുടെ ചവിട്ടു പടിയാണ്‌ സയൻസ്. അതില്ലാത്ത ലോകം നമുക്ക് ഭാവനയിൽ പോലും കാണാൻ കഴിയില്ല. അതെസമയം സയൻസിനെ കുറിച്ചു അന്ധവിശ്വാസം വെച്ചു പുലർത്തേണ്ട ആവശ്യവുമില്ല. മനുഷ്യ വർഗത്തിന്റെ  എല്ലാമെല്ലാം സയൻസല്ല. സയൻസിന് അതിന്റേതായ പരിമിതികളും പോരായ്മകളും ഉണ്ട്.   സകല പ്രതിഭാസങ്ങളുടെയും പിന്നിലുള്ള ശാസ്ത്രീയമായ തെളിവുകൾ കണ്ടുപിടിക്കാൻ അത്ര പ്രബലമല്ല നമ്മുടെ ഇന്നത്തെ   സയൻസ്. അതിനു എത്താവുന്നതിനു ലിമിറ്റുണ്ട്. സയൻസിന് നേരിടാൻ കഴിയാത്ത ചോദ്യങ്ങളുമുണ്ട്.

എല്ലാറ്റിനും ശാസ്ത്രീയമായ തെളിവ് വേണമെങ്കിൽ കുറ്റമറ്റ സർവ ശക്തമായ സയൻസ് വേണം. അങ്ങനെ ഒന്നില്ല. അതിനാൽ നിത്യ ജീവിതത്തിൽ മനുഷ്യർക്ക് പലതിലും വിശ്വസിക്കാൻ ശാസ്ത്രീയമായ തെളിവുകൾ വേണമെന്നില്ല, യുക്തിപരമായ നിഗമനങ്ങൾ മതി. കൂട്ടിലുള്ള പെണ് പക്ഷി മുട്ടയിടാൻ കാരണം കൂട്ടിലുള്ള   ആണ് പക്ഷിയാണ് എന്നു മനസ്സിലാക്കാൻ ശാസ്ത്രീയമായ തെളിവുകളൊന്നും വേണമെന്നില്ല.  യുക്തി മതി. പല പ്രതിഭാസങ്ങളും  വിലയിരുത്താൻ സയൻസ്  അശക്തമാണ്.    

ശാസ്ത്രീയമായ തെളിവുകൾ ഇല്ലാത്തതൊക്കെ സയൻസിന്   എപ്പോഴും അഭൗതികമാണ്. തെളിവ് കിട്ടിയാൽ അതു ഭൗതികമായി. ഇലക്ട്രിസിറ്റിയും റേഡിയോ തരംഗങ്ങളും ഗ്രാവിറ്റിയും മുമ്പ്   സയൻസിന് ഭൗതികമായിരുന്നില്ല.   അവ കണ്ടുപിടിച്ചപ്പോൾ ഭൗതികമായി. സയൻസ് വളർന്നു കൊണ്ടേ യിരിക്കുന്നു. ഒരിക്കലും പൂർണ്ണ വളർച്ച എത്താതെയാണ് അതിന്റെ നിൽപ്. ഒരു വേള അതു സൂക്ഷ്മവും സ്ഥൂലവുമായ പ്രപഞ്ചങ്ങളിലെ ക്രമവും ക്രമ രാഹിത്യവും കണ്ടു അന്ധാളിച്ചു നിൽക്കുകയും ചെയ്യുന്നു. 

എന്ത്  പ്രതിഭാസത്തെയും നിലവിലുള്ള ശാസ്ത്രീയ സംവിധാനങ്ങൾ ഉപയോഗിച്ചു അളക്കാനെ സയൻസിന് കഴിയൂ. ശാസ്ത്രീയ സംവിധാനങ്ങൾ ശക്തമാകുന്നതിനു അനുസരിച്ചു   സയൻസും ശക്തമാകും. നിലവിലുള്ള ശാസ്ത്രീയ സംവിധാനങ്ങളുടെ പോരായ്മകൾ പ്രപഞ്ചത്തിന്റെ വിദൂരതകളിലേക്ക്  കടന്നു ചെല്ലുന്നതിൽ നിന്നും സയൻസിനെ തടയുന്നു. മനുഷ്യന്റെ മസ്തിഷ്ക പ്രവർത്തനങ്ങളിലേക്ക് വേണ്ടത്ര   കടന്നു ചെല്ലാനും നിലവിലെ ശാസ്ത്രീയ സംവിധാനങ്ങൾ കൊണ്ടു സയൻസിന് സാധ്യമായിട്ടില്ല.  

അളക്കുകയും എണ്ണുകയും തിട്ടപ്പെടുത്തുകയുമൊക്കെ  ചെയ്യുക എന്നല്ലാതെ ഒരു പ്രതിഭാസത്തിന്റെയും വിധി പറയാൻ സയൻസിന്  കഴിയില്ല. ശരീരത്തിൽ ചീത്ത കൊളസ്‌ട്രോൾ എത്രയുണ്ടെന്നും ഗ്ലോബൽ വാമിങ് എത്രയുണ്ടെന്നുമൊക്കെ  സയൻസ് ഉപയോഗിച്ചു കണ്ടെത്താം. എന്നാൽ അവ നല്ലതാണോ ചീത്തയാണോ അപകടകരമാണോ  എന്നൊന്നും സയൻസ് വിധി പറയില്ല. വിവരങ്ങൾ തന്നു വിധി പറച്ചിൽ സയൻസ് മനുഷ്യന് വിട്ടുതരുന്നു. നന്മ തിന്മകൾ വിവേചിച്ചു തരൽ സയൻസിന്റെ പരിധിയിൽ പെടില്ല

ശാസ്ത്രീയമായ അറിവുകൾ എന്തിനു ഉപയോഗിക്കണം, എന്തിനു പാടില്ല എന്നു പറയാനും സയൻസ് അശക്തമാണ്. ഹിരോഷിമയിൽ അണു ബോംബ്  ഇടാനോ ഇടാതിരിക്കാനോ സയൻസ് പറയില്ല. പറയാൻ സയൻസിന് അറിയില്ല. സയൻസിന് വികാരങ്ങളില്ല. വികാരങ്ങൾ മനസ്സിലാക്കാനും മൂല്യ പരിശോധന നടത്താനും സയൻസിന് കഴിയില്ല. വിവേകമില്ലാത്ത മനുഷ്യർ സയൻസ് കൈകാര്യം ചെയ്യുമ്പോൾ മനുഷ്യ വർഗ്ഗത്തിനു തന്നെ അത് അപകടം വരുത്തി വെക്കുന്നു. വീഴ്ചകൾ വന്നാൽ സയൻസ് ഒരിക്കലും മാപ്പ് പറയാറില്ല. ഒരുവേള, മനുഷ്യ വർഗത്തിന്റെ സമ്പൂർണ്ണ നാശം തന്നെ സയൻസ് കൊണ്ടാകും എന്നു  ഭയപ്പെടേണ്ട അവസ്ഥയിലേക്ക് സയൻസ് നീങ്ങിക്കൊണ്ടിരിക്കുന്നു. 

ശാസ്ത്രീയമായ കണ്ടുപിടുത്തങ്ങളുടെ തുടക്കം ശാസ്ത്രജ്ഞരുടെ നിഗമനങ്ങളിൽ നിന്നാണ്. നിഗമനങ്ങളിൽ നിന്നു അവർ സിദ്ധാന്തങ്ങൾ മെനയുകയും പിന്നീട് അതിനു ശാസ്ത്രീയമായ തെളിവ് കണ്ടെത്തുകയും ചെയ്യുന്നു. പ്രസിദ്ധമായ ആപേക്ഷികതാ സിദ്ധാന്തം പോലും ഇങ്ങനെയാണ്. ഇങ്ങനൊക്കെ  ആണെങ്കിലും സയൻസ് കാര്യങ്ങൾ എങ്ങനെ എന്നത് മാത്രമാണ് കാണിച്ചു തരിക. എന്തു കൊണ്ട്  എന്ന ചോദ്യത്തിന് സയൻസ് മറുപടി പറയാറില്ല. ശാസ്ത്ര അന്വേഷണത്തെ നിലവിലുള്ള ശാസ്ത്ര ജ്ഞാനം തന്നെ പരിമിതപ്പെടുത്തുന്ന അവസ്‌ഥയുമുണ്ട്.  ഉദാഹരണം, കോപ്പർ നിക്കസിന്  തന്റെ  പ്ലാനറ്ററി മോഷൻ തിയറി വേണ്ടത്ര തെളിയിക്കാൻ കഴിഞ്ഞില്ല. കാരണം അന്ന് കാൽക്കുലസ് കണ്ടു പിടിച്ചിരുന്നില്ല. 

മാനവരാശിക്ക് വിശാലമായ ഒരു ലോക വീക്ഷണം സംഭാവന ചെയ്യാനുള്ള ത്രാണിയൊന്നും സയൻസിന് ഇല്ല. സത്യവും നീതിയും പുലരുന്ന സുന്ദരമായ ഒരു ലോകം വിഭാവന ചെയ്യാനും സയൻസിന് കഴിയില്ല. അത്തരം  സൗന്ദര്യങ്ങളൊന്നും സയൻസിന് വിശദീകരിക്കാൻ പറ്റാത്ത ഒന്നാണ്. സയൻസ് നന്നായി കടിക്കുന്ന ഒരു പോലീസ് നായയെ പോലെയാണ്. തുറന്നുവിട്ടാൽ എല്ലാവരെയും കടിച്ചു മുറിവേല്പിക്കും.  കൂട്ടിലിട്ടും നിയന്ത്രിച്ചും കൊണ്ടു നടന്നാൽ അതു ഉപകാര പ്രദമായ തെളിവുകൾ കാണിച്ചു തരും.   അതിലപ്പുറം ശാസ്ത്രം മാത്രം വാദവും ശാസ്ത്ര അതിവാദവും ശാസ്ത്ര ത്തിന്റെ കഴിവിലുള്ള അന്ധ വിശ്വാസവും യുക്തിയുള്ള ഒരു മനുഷ്യനും ഉൾക്കൊള്ളാൻ കഴിയില്ല. അതെസമയം സയൻസിനെ അവമതിക്കേണ്ട ആവശ്യവുമില്ല. ഉള്ളത്  ഉള്ളതുപോലെ നമുക്ക്  വക വെച്ചു കൊടുക്കാം.

അൻസാർ അലി നിലമ്പൂർ